Finlandiyä tatarları

Kemnär alar?

Tatarlar Finlandiyägä St Petersburg-Helsinki timer yulı salıngaç 1800 asır urtalarında säüdä yulı belän kilä başlagannar. Başta Rusiyägä, Nizhnij Novgorod vilayäteneñ tugan avıllarına kaytıp yöregännär. Soñgarak ailäläre dä Finlandiyäneñ törle yaklarına kilep urnaşkannar. Küçenülär Rusiyäneñ inkilbına kadär dävam itkän. Finlandiyä bäysez bulgaç häm din azatlıgı öçen kanun çikkaç, tatarlar 1925 yılda berençe dini cämgat korgannar. Cämgatneñ zurlıgı 500 azadan ibarät bulgan.

Tatar iseme törle törki kavemnärgä has. Bügenge könne yakınça 800 keşelek tatar azçılıgı Finlandiyäneñ könyagında, baş şähär tiräsendä yäşi. Köndälek tormışta fin yäki şvet tele belän aralaşsalar da üz ana tellären häm milli mädäniyätlären saklap kilälär. Tatar tele törki tellär ailäseneñ könbatış tarmagına kerä. Finlandiyä tatarları kübesençä mişär dialektında söyläşälär.

Dönyada tatarlar sanı törle çıganaklarga karata urtaça 7 million.Tatarstan respublikasında, Rusiyädä, sannarı urtaça 3 million häm böten Rusiyä ilendä 5,5 million, kalgannarı dönyanıñ törle taraflarında yäşilär.

Finlandiyä tatarları tirä-yak könküreşenä tigez sıyınıp häm ictimai yäşäyeşenä bäyä birep üzençälekle tormış korgannar. Finlandiyäneñ ictimai tormışı tatarlarga üz mädäniyätlären saklarga bişençe buınga kadär mömkinlek birep tora